Reprize Skûlje yn Jorwert Yn april 2017 komt J&Mteaterwurk fan Jan Arendz en Marijke Geertsma mei in reprize fan de foarstelling ‘Skûlje yn Jorwert’. Der wie safolle flecht op ‘e koai en de reaksjes wiene sa geweldich, dat it sil nochris heve… In toanielfoarstelling nei oanlieding fan it boek ‘Nachtboek van een kerkuil’, skreaun troch Bas van Gelder. Bas van Gelder hat dûmny west yn Jorwert krekt yn de oarlochsjierren ‘40-’45. Hoewol it liket dat der yn Jorwert earst net folle fan de Dútske besetting te fernimmen is yn ferliking mei Leiden, dêr’t hy weikomt, ûntkomt ek Jorwert net oan de oarloch. De dûmny dy’t ûnderdûke moat ( yn syn eigen tsjerke), wurdt ferret en oppakt en komt yn de finzenis fan Ljouwert te lâne. Jorwert is in hecht doarp, mar ek yn dit doarp wenje njonken minsken, dy’t yn it ferset sitte, ek minsken dy’t de filosofy fan Hitler oanhingje. In lytse mienskip prachtich opservearre troch in dûmny dy’t fan bûten Fryslân yn Jorwert bedarret yn de oarlochsjierren, wêryn de eigenskippen fan de minsken harren krekt wat dúdliker ôftekenje. Wy ûntfange jim mei kofje en tee yn kafee ‘Het Wapen van Baarderadeel’, dêrnei meitsje wy in kuierke troch Jorwert, sadat jim in bytsje ynsjoch krije yn it doarp út dy jierren. Yn de kuier is ek in eksposysje opnommen mei spesjaal materiaal út dy tiid. As wy nei 3 kertier werom binne yn it kafee, nimt de dûmny (Jan Arendz) jim mei nei de tsjerke fan Jorwert foar de foarstelling. Der is ek in mooglikheid om by it toanielbarren in lunch of diner te brûken.

Foarstellingsdata 2017 Freed  7 april 19.30 oere Freed  21- 28 april 14.00 oere en 19.30 oere Sneon 22 - 29 april 19.30 oere Snein  9 - 23 - 30 april 14.00 oere Mear ynformaasje oer de foarstelling: belje mei 06-44282677 of mail nei jmteaterwurk@hotmail.com